News

अनलॉक २.० च्या योजनेबाबत मोदींची राज्यांना महत्वाची सूचना

नवी दिल्ली: देशभरातील करोना रुग्णांची संख्या साडेतीन लाखांच्या वर पोहोचली आहे. देशातील २१ राज्यांमध्ये करोना संसर्गाची गती मंद असती तरी, महाराष्ट्र, दिल्ली, तामिळनाडू, गुजरातसारख्या राज्यांमध्ये ही गती तीव्र आहे. करोनाचे हे संकट लक्षात घेत पंतप्रधान नरेंद्र मोदी यांनी सतत दोन दिवस देशातील विविध राज्यांच्या मुख्यमंत्र्यांशी चर्चा केली. आता आवश्यकता आहे ती लॉकडाउनच्या अफवांशी लढण्याची आणि अनलॉक २.० ची योजना तयार करण्याची असे वक्तव्य पंतप्रधान नरेंद्र मोदी यांनी मुख्यमंत्र्यांच्या बैठकीत केले.

पंतप्रधान नरेंद्र मोदी यांनी देशातील करोना संकटाच्या पार्श्वभूमीवर १६ जून आणि १७ जून अशा दोन दिवस विविध राज्यांच्या मुख्यमंत्र्यांसोबत बैठका घेतल्या. या बैठकांमध्ये मोदींनी देशात सुरू असलेल्या अनलॉक- १.० वर चर्चा केली. या वेळी त्यांनी देशात उपलब्ध असेलेल्या करोना विषाणूच्या चाचणी क्षमतेचा पुरेपूर वापर केला पाहिजे, अशी सूचनाही केली. तसेच, या चाचण्यांची क्षमता सतत वाढवत नेली पाहिजे, असेही ते म्हणाले.

देशात करोनाबाधितांची संख्या वाढत असल्याकारणाने देशात पुन्हा एकदा लॉकडाउन घोषित केले जाईल अशा अफवा पसरलेल्या आहेत. मात्र, आता या अफवांशी लढावे लागेल असे मोदी म्हणाले. तसेच या पुढच्या काळात अनलॉक-२.० कसा असेल याचा पद्धतशीरपणे विचार करावा लागेल असे मोदी म्हणाले. करोना विषाणूचा प्रसार हा मोठी राज्ये आणि मोठ्या शहरांमध्ये अधिक असल्याचेही मोदी म्हणाले.

वाचा: आरोग्यमंत्र्याना करोनाची लागण; अनेकांना व्हावे लागणार क्वारंटीन

देशातील आर्थिक व्यवहारांमध्ये गती आणण्याची आवश्यकता असल्याचेही पंतप्रधान मोदी या बैठकीत म्हणाले. राज्यांनी आपल्या राज्यातील पायाभूत सुविधा आणि उत्पादन कार्याला उत्तेजना देण्यासाठी पावले उचलावीत असेही ते म्हणाले. त्याच प्रमाणे येणाऱ्या काळामध्ये स्थलांतरित मजुरांपुढील समस्या कोणत्या हे ओळखून त्या सोडवण्याच्या दिशेने राज्यांनी आता पावलं उचलायला हवीत, असे मोदी म्हणाले.

वाचा: आता मुंबईत जाण्याची हिंमतच होत नाही; करोनासंदर्भात गडकरींचे वक्तव्य

या बैठकीत सहभागी झालेल्या मुख्यमंत्र्यांनी आपल्या राज्यातील करोनाची स्थिती काय आहे आणि त्यावर मात करण्यासाठी काय उपाययोजना केल्या जात आहेत, या बाबत माहिती दिली. या बरोबरच राज्यातील पायाभूत सुविधा आणि त्या किती सक्षम आहेत, तसेच त्या सक्षम बनवण्यासाठी कोणती पावले उचलण्यात आली याचीही माहिती मुख्यमंत्र्यांनी पंतप्रधानांना या बैठकीत दिली. तसेच, करोनाच्या चाचण्या वाढवण्यावर आता भर दिला जाणार असल्याचेही मुख्यमंत्र्यांनी सांगितले. या सोबतच आपापल्या राज्यात जाऊन परत येणाऱ्या स्थलांतरित मजुरांना रोजगार उपलब्ध करून देण्याच्या दृष्टीने परिस्थिती निर्माण करण्यावरही मुख्यमंत्र्यांनी या बैठकीत जोर दिला.

वाचा: कहर करोनाचा: देशातील ‘या’ राज्याने पुन्हा जाहीर केला लॉकडाउन

Leave a Reply

Your email address will not be published. Required fields are marked *

Time limit is exhausted. Please reload the CAPTCHA.