News

मुंबईकरांवर पाणीकपातीची टांगती तलवार; अपेक्षेप्रमाणे पाऊस न पडल्यास परिस्थिती कठीण

– गेल्या वर्षीच्या तुलनेत जास्त पाणीसाठा, तरीही खबरदारी

– मुंबईकरांची तहान भागवण्यासाठी मोठ्या पावसाची गरज

– अपेक्षेप्रमाणे पाऊस न पडल्यास परिस्थिती कठीण

म. टा. विशेष प्रतिनिधी, मुंबईः
गेल्या दहा ते बारा दिवसांपासून पावसाने दडी मारली आहे. त्यामुळे जुलैच्या पहिल्या आठवड्यापर्यंत तरी मुंबईला पाणीपुरवठा करणाऱ्या तलावांमधील पाणीसाठ्यात फार मोठी वाढ झालेली नाही. गेल्या वर्षीच्या तुलनेत यंदा सुमारे एक लाख दशलक्ष लिटर पाणीसाठा अधिक असला तरी दीड कोटी मुंबईकरांची तहान भागवण्यासाठी आणखी मोठ्या पावसाची गरज आहे. या आठवड्याअखेरपर्यंत पावसाची वाट पाहून पाणीकपात करायची, की आणखी काही दिवस पावसासाठी थांबून मग कपात करायची याचा निर्णय पालिका पुढील आठवड्यात घेणार आहे.

जूनच्या पहिल्या आठवड्यापासून मुंबईकरांना झोडपून काढणाऱ्या पावसाने मागील काही दिवसांपासून विश्रांती घेतली आहे. त्यामुळे ऐन पावसाळ्यात मुंबईकरांच्या घामाच्या धारा निघत आहेत. दुसरीकडे शहराला पाणीपुरवठा करणाऱ्या ठाणे, पालघर, नाशिकमधील पाणलोट क्षेत्रात पावसाचा फारसा जोर नाही. त्यामुळे तानसा, मोडकसागर, भातसा व मध्य वैतरणा या सर्वाधिक पाणी साठवणाऱ्या तलावांमध्ये पाण्याची मोठी वाढ झालेली नाही. ६ जुलै रोजी सर्व तलावांमध्ये मिळून दोन लाख ७० हजार दशलक्ष लिटर म्हणजे १८.७२ टक्के पाणीसाठा शिल्लक आहे.

गेल्या वर्षीच्या तुलनेत हा पाणीसाठा जास्त आहे. तलावांमध्ये दहा टक्क्यांच्या खाली राखीव साठा समजला जातो. सध्याचा साठा हा अतिरिक्त आठ टक्के असला तरी निसर्गाचा लहरीपणा पाहता येत्या काही दिवसांत दमदार पाऊस पडला नाही तर पिण्याच्या पाण्याची परिस्थिती कठीण होऊ शकते. पालिका नेहमी ३० जुलैपर्यंत पुरेसा पाणीसाठा आणि येत्या काळातील पावसाचा अंदाज घेऊन कपातीचा निर्णय घेते. सध्या असलेल्या साठ्याच्या तुलनेत पाणीकपातीची शक्यता नाही. तरीही खबरदारी म्हणून पालिका लवकरच निर्णय घेण्याची शक्यता आहे.

हवामान खात्याने या आठवडाअखेरीस पुन्हा दमदार पाऊस होण्याचा अंदाज व्यक्त केला आहे. त्याची वाट पाहू, तसेच पुढील आठवड्यातही पाऊस न आल्यास कपातीचा निर्णय घ्यायचा की आणखी काही दिवस वाट पाहायची याबाबत बैठक घेतली जाणार आहे, अशी माहिती पालिकेचे प्रमुख जल अभियंता अजय राठोड यांनी दिली.

यंदा एक लाख एमएलडी अधिक

सर्व सात तलाव पूर्ण भरण्यासाठी १४ लाख ४७ हजार ३६३ मिमी पाणीसाठ्याची आवश्यकता आहे. सध्या दोन लाख ७० हजार ९३७ दशलक्ष लिटर इतका पाणीसाठा आहे. सन २०२०च्या तुलनेत यंदा एक लाख दहा हजार दशलक्ष लिटर पाणी अधिक आहे. सन २०२०मध्ये ६ जुलैला ११.१० टक्के म्हणजे एक लाख ६० हजार ६९२ दशलक्ष लिटर पाणीसाठा होता. २०१९मध्ये १४.९६ टक्के म्हणजे दोन लाख १६ हजार ५२२ दशलक्ष लिटर पाणीसाठा शिल्लक होता.

तलाव पाणीसाठा (दशलक्ष लिटर) आत्तापर्यंतचा पाऊस (मिमी)

अप्पर वैतरणा उपलब्ध नाही ३६८

मोडकसागर ४३,७१८ ५७४

तानसा ४५,१६६ ५३९

मध्य वैतरणा २३,२०१ ४०८

भातसा १,३६,०११ ४७९

विहार १६,९०४ ९७६

तुळशी ५,९३७ १,५१९

तीन वर्षांतील १ जुलैचा पाणीसाठा (दशलक्ष लिटर)

२०१९ : २,१६,५२२

२०२० : १,६०,६९२

२०२१ : २,७०,९३७

Leave a Reply

Your email address will not be published. Required fields are marked *

Time limit is exhausted. Please reload the CAPTCHA.